所向無前

打機抽到夏侯淵，諗起件小事。

某年敝中學中辯隊用左句口號：「X X中辯，所向無前！」睇落好似好勁，中二角度黎講可能係型棍，但我睇到皺哂眉頭。

「所向無前」四個字出自《三國志．魏書．夏侯淵傳》：

初，枹罕宋建因涼州亂，自號河首平漢王。太祖使淵帥諸將討建。淵至，圍枹罕，月餘拔之，斬建及所置丞相已下。淵別遣張郃等平河關，渡河入小湟中，河西諸羌盡降，隴右平。太祖下令曰：「宋建造為亂逆三十餘年，淵一舉滅之，虎步關右，所向無前。仲尼有言：『[1] 吾與爾不如也。』」

【錯譯】

當初，枹罕人（今甘肅省臨夏附近地區）宋建因為涼州動亂，自號為「河首平漢王」。曹操命令夏侯淵統帥征討宋建。夏侯淵去到，圍困枹罕，用左一個月多啲就攻陷枹罕，斬殺宋建同埋佢任用嘅官員。夏侯淵另外派遣張郃同其他人平定河關（今青海地區），仲過河攻入小湟中（都係今日青海地區，但更深入），河西（黃河以西）嘅唔同羌族人全部投降，隴右就此平定。

曹操就下令讚話：「宋建叛亂三十幾年，夏侯淵一舉殲滅，虎步關右，所向無前。孔子對子貢講過：『我同你都不如顏回呀。』」

【注】

[1] 吾與爾不如也。哩句係孔子對子貢講嘅。故事大約係咁：孔子問子貢，你叻啲定顏回叻啲呀？子貢答，顏回叻過我好多。孔子就話，啱呀，我同你都無顏回咁叻。

哩句係用顏回比喻夏侯淵，讚緊佢。至於曹操用孔子比喻自己，亦都係順手讚埋自己。

有讀三國嘅應該知道，夏侯淵嘅結局係兵敗死喺黃忠手上。如果無記錯，同年敝中學中辯隊都係贏唔到嘅。

唔好話我迷信，引經據典拋書包前，真係要讀多啲書先。