[1] 咩係「春秋筆法」？以下抄自維基：
春秋筆法，又稱春秋書法或微言大義，指行文中雖然不直接闡述對人物和事件的看法，但是卻透過細節描寫，修辭手法（例如詞彙的選取）和材料的篩選，委婉而微妙地表達作者主觀看法。原意是指由後世人嚴格查定前人，看誰是極惡之人、誰尊敬當朝，即所謂「善惡自有歷史證明」。當下，春秋筆法則指文章用筆曲折而意含褒貶的寫作手法。
[2] 簡單啲講，即係睇文要用腦。
[3]「我唔直接答你，我用例子答你」，哩個都算係春秋筆法。所以可能你平時已經用緊，只係你唔覺。
[4] 畀個引子，上次講避諱，有哩一段：
《世說新語．方正第五》：盧志於眾坐，問陸士衡：「陸遜、陸抗是君何物？」答曰：「如卿於盧毓、盧珽。」士龍失色，既出戶，謂兄曰：「何至如此，彼容不相知也。」士衡正色曰：「我父、祖名播海內，寧有不知，鬼子敢爾！」
[5] 簡單同大家重溫一下，魏晉時代，講人地全名係一種冒犯，除非你係對方嘅上司、長輩。
[6] 平時大家互相稱呼，會用表字。例如陸機字士衡，你可以想像如果同陸機做同事，你會叫佢「士衡」，而唔會叫「阿機」。但係老細就可以叫全名「陸機」。
[7] 正因為叫全名係一種冒犯，所以如果你當人地面開佢祖先嘅全朵，係等同直接宣戰。上面個例子，盧志問陸機：「陸遜、陸抗（即係陸機阿爺同老豆）係你邊位呀？」陸機答：「即係你嘅盧毓、盧珽（即係盧志阿爺同老豆）。」其實已經駁緊火。
[7] 咁關「春秋筆法」咩事呢？留意第一句：盧志於眾坐，問陸士衡。睇作者用盧志、陸士衡，已經表明褒貶。
[8] 盧志，作者直呼其名。陸機，作者用陸士衡，用嘅係表字。
[9] 作者認為邊個岩，邊個唔岩，唔洗講啦。
[10] 畀多段。
[11] 《三國志．蜀書五．諸葛亮傳》，除左講諸葛亮，其實同一篇入面仲講埋佢個仔諸葛瞻、董厥同樊建。睇睇以下一段。
董厥者，丞相亮時為府令史，亮稱之曰：「董令史，良士也。吾每與之言，思慎宜適。」徙為主簿。亮卒後，稍遷至尚書僕射，代陳祗為尚書令，遷大將軍，平臺事，而義陽樊建代焉。延熙十四年，以校尉使吳，值孫權病篤，不自見建。權問諸葛恪曰：「樊建何如宗預也？」恪對曰：「才識不及預，而雅性過之。」後為侍中，守中書令。自瞻、厥、建統事，姜維常征伐在外，宦人黃皓竊弄機柄，咸共將護，無能匡矯，然建特不與皓和好往來。蜀破之明年春，厥、建俱詣京都，同為相國參軍，其秋並兼散騎常侍，使蜀慰勞。
[12] 錯譯：
董厥，喺諸葛亮做丞相嗰陣，係諸葛亮嘅府令史。諸葛亮贊過董厥：「董令史，好野黎呀，我同佢傾過幾句，佢係思考慎密恰當嘅人。」後來就升做主簿。
諸葛亮死之後，升做尚書僕射，之後代陳祗做尚書令，再升做大將軍，又分一半尚書令嘅職責。而尚書令就變左義陽人樊建做。
延熙十四年，樊建以校尉嘅官職出使吳國。嗰陣孫權病危，無見到樊建。後來孫權問諸葛恪：「新黎嘅樊建勁啲，定係之前嘅宗預勁啲？」諸葛恪答：「樊建才學見識都差過宗預，但係人品好啲。」後來樊建做侍中，acting做中書令。
當時蜀國內政就係由諸葛亮個仔諸葛瞻、董厥、樊建負責。姜維就剩係識出去打仗。宦官黃皓把持朝政，個個都刷佢鞋，無個做到野，然而樊建就係特別唔去刷黃皓鞋嗰個。
蜀國亡國之後一年嘅春天，董厥、樊建都去左魏國都城洛陽返工，一齊做相國參軍，同年秋天就做散騎常侍，返去蜀國慰問鄉親父老。
[13] 上去睇返bold 左嗰句：「自瞻、厥、建統事……然建特不與皓和好往來」
[14] 然而樊建就係特別唔去刷黃皓鞋嗰個。即係講緊：
諸葛亮個仔諸葛瞻同埋董厥都有份刷宦官黃皓鞋呀。
[15] 哩個就係春秋筆法嘅好例子啦。
[16] 下一篇，我地講《左傳》，鄭伯克段於鄢。
