避諱之一（秦始王都只係唔畀你用兩隻字）

喺古代帝制極權社會，嗱，即係二千幾年前去到百幾年前左右啦，好似係，總之就唔關而家事。有樣極權專制獨裁社會既產物，叫做「避諱」。

即係：「要避開觸犯忌諱的東西」。

「忌諱的東西」有好多，視乎被觸犯者既玻璃心有幾脆弱啦，有啲就連幸福都怕，碰到棉花也會受傷。

而家眾所周知啦，起碼有八隻字唔講得。

【有8個字唔講得】憂上街高舉白紙變港獨 柳俊江：人心虛怯

至於喺「極權專制獨裁」既古代，通常係避一樣野——「皇帝個名」

1. 秦始皇

當時個鼻仔其實唔係好扁姐

[1] 我地由第一個皇帝秦始皇個老豆，秦莊襄王講起。

[2] 秦莊襄王，姓嬴，名子楚。

[3] 秦始皇：「你班仆街唔準講我老豆個名。以後個『楚』字唔用得﹗」

[4] 以上為設計對白。

[5] 嗱，「楚」字唔用得，但係當時明明就有大大個「楚國」存在緊……後世既我地當然知道秦始皇既解決方法係滅左「楚國」啦。但係喺必須要用個「楚」字，而又唔用得個「楚」字既時候，唯有用個意思相同或相近既字改左佢。例如

丞相綰等言：「諸侯初破，燕、齊、荊地遠，不為置王，毋以填之。請立諸子，唯上幸許。 《史記．卷六．秦始皇本紀第六》

[6] 用返人類語言解釋：

丞相王綰話：「滅六國後，燕國、齊國、荊國遠離秦國，難以直接管治，所以應該分封皇子做燕王、齊王、荊王，管治哩啲地方。」

[7] You see ~ 秦始皇時代，「荊」即係「楚」。

[8] 根據劉殿爵教授既論文，「避諱」似乎要到秦始皇時代先出現。

睇黎秦始皇係孝順仔。

[9] 又，《史記》話，秦始皇，姓嬴，名政。咁你可能會覺得，個「政」字就實要避啦。

《史記索隱》：「秦諱正，謂之端。」