[1] 喺魏晉南北朝時候，避諱真係一件好重要嘅事。避諱唔單止係避皇帝個名，你仲要避自己老豆個名。如果你當面響人地老豆祖先個朵，同直接宣戰無分別。以下講一段：
[2] 《世說新語．方正第五》：盧志於眾坐，問陸士衡：「陸遜、陸抗是君何物？」答曰：「如卿於盧毓、盧珽。」士龍失色，既出戶，謂兄曰：「何至如此，彼容不相知也。」士衡正色曰：「我父、祖名播海內，寧有不知，鬼子敢爾！」
[3] 【錯譯】：有日盧志喺眾目睽睽之下問陸機：「陸遜、陸抗係你邊位呀？」陸機答：「即係你嘅盧毓、盧珽。」陸機細佬陸雲嚇到傻左，散席出門口即刻同阿哥講：「阿哥，唔洗玩咁大呱，可能佢真係唔知呢。」陸機認真咁答：「我地老豆，阿爺，名播海內，無人唔識。我屌佢老母啦。」
[4] 因為哩單野，盧志、陸機成為仇人，盧志返工得閒無事就抹黑下陸機，最後兩個人都因為八王之亂而死。詳情㩒入連結睇維基。
[5] 哩啲野真係唔講得笑。所以當時打工仔，如果有老細新上任，係要問定老細有咩諱要避，費事踩親老細條尾，哩個行為叫做「請諱」。例如哩段：
[6] 《世說新語．賞譽第八》：「王藍田拜揚州，主簿請諱，教云：『亡祖、先君，名播海內，遠近所知。內諱不出於外，餘無所諱。』」
[7] 【錯譯】：王述新上任做揚州刺史，佢嘅主簿問有詳諱要避。王述答：「祖父王湛、父親王承，名播海內，遠近所知。唔洗特別講。屋企女人嘅名，唔會話畀外人聽，除此以外無野需要避。」
[8] 王述竟然喺哩個咁小氣嘅社會話「餘無所諱」。唔簡單，唔怪得人地要特登寫一篇野記低佢。
[9] 時間拉前少少，去三國時代。吳景帝孫休非常仁愛，覺得避諱哩壇野相當無聊，所以佢特登造字幫自己四個仔改名，咁就無人踩到佢條尾。有好多字顯示唔到，請按連結，詔書如下：
[10]「人之有名，以相紀別，長為作字，憚其名耳。禮，名子欲令難犯易避，五十稱伯仲，古或一字。今人競作好名好字，又令相配，所行不副，此瞽字伯明者也，孤嘗哂之。或師友父兄所作，或自己為；師友尚可，父兄猶非，自為最不謙。孤今為四男作名字：太子名𩅦，𩅦音如湖水灣澳之灣，字 ， 音如迄今之迄；次子名𩃙，𩃙音如兕觥之觥，字 ， 音如玄礥首之礥；次子名壾，壾音如草莽之莽，字昷，昷音如舉物之舉；次子名 ， 音如褒衣下寬大之褒，字 ， 音如有所擁持之擁。此都不與世所用者同，故鈔舊文會合作之。夫書八體損益，因事而生，今造此名字，既不相配，又字但一，庶易棄避，其普告天下，使咸聞知。」
[11] 【錯譯】：「人之所以有名，係用來記認分別，大個左再有字，係人唔想直呼其名，費事得罪邊個邊個。為左哩啲on9野禮法，我想幫個仔改名，令人難犯易避。以前人五個十個都叫伯仲，即係阿大阿二嘅意思，唔洗煩。
古時嘅字得一個字，而家啲人要改好名好字，要名。字相配，但係睇返佢嘅行為，同個名真係一啲都唔襯，以前有個盲人叫瞽字伯明，真係笑大人個口。有啲名、字，係師友父兄作，又有啲係自己改。師友改可能都貼切，父兄改就多數唔係架啦，自己改就最唔知醜。俊？你邊撚度俊呀？睇過？
我今日幫四個仔改名：
太子名𩅦，𩅦音如湖水灣澳之灣，字莔，莔音如迄今之迄；
二仔名𩃙，𩃙音如兕觥之觥，字𧟨，𧟨音如玄礥首之礥；
三仔名壾，壾音如草莽之莽，字昷，昷音如舉物之舉；
四仔名 ， 音如褒衣下寬大之褒，字㷏，㷏音如有所擁持之擁。
哩啲都唔係世人所用嘅字，我睇古文搵啲字夾埋一齊就當係。書法文字嘅野，都係有需要就做架啦。今日我造哩幾隻字，名、字之間完全唔關事，而且字都係得一個字，非常易避，除非你特登啦。今日我普告天下，要大家都知道。」
[12] 孫休is so considerate。但係孫休早死，四個仔仲細。吳國臣子希望立年長嘅國王，佢地揀左吳末帝孫皓。其後孫皓殺左孫休大嗰兩個仔。
[13] 哩啲就係中國式嘅好人無好報了。
【壽桃廣告】喜聞樂見 Medium 成功逼走唔少中文作者。黎緊我亦都會搬去Patreon，哩度嘅更新應該就。。。應該會好少啦。月費玩票性質 $1.69 鎂。收 $1鎂 係因為想對得住捨得出錢支持嘅讀者。至於額外嘅 $0.69鎂 當然係個人惡趣味。壽桃 Patreon
