【壽桃按】喜聞樂見 Medium 成功逼走唔少中文作者。黎緊我亦都會搬去Patreon，哩度嘅更新應該就。。。應該會好少啦。月費玩票性質 $1.69 鎂。收 $1鎂 係因為想對得住捨得出錢支持嘅讀者。至於額外嘅 $0.69鎂 當然係個人惡趣味。壽桃 Patreon
【壽桃再按】睇到白麻哩張相，一時忍唔住，出左。。。寫出左篇文。介紹返，清代有兩本書分別叫做《貓苑》同《貓乘》。兩位貓奴作者輯錄古今有關貓嘅記載而成書。博客來有售，不過書只有文言原文，要睇注解嘅話，都係等我黎啦。
【原文】
《古今詩話》：貓能飲酒，故李純甫有〈貓飲酒〉詩。
漢按：貓飲酒，余嘗試之，果爾，但不可驟飲以杯，須蘸抹其嘴，貓舔有滋味，則不驚逸，然十餘巡後，輒覺醺醺如也。
今之貓，又能食煙。陳寅東巡尹曰：「有張小涓者，為浙中縣尉。嘗僑寓溫州，有貓數頭，慣登煙榻，小涓常含煙噴之，貓皆能以鼻迎（口畜）。久之，形狀如醉，每見開燈輒來，斂具則去，於是人皆謂張小涓貓亦有煙癖，聞者莫不粲然。」然則貓於煙酒乃有兼嗜焉，亦可笑也。
【錯譯】
《古今詩話》記載：貓能飲酒，所以金代李純甫有〈貓飲酒〉詩。
作者黃漢話：貓飲酒，我試過呀，我真係試過！！！真架，但唔可以畀貓飲一大杯，要攞酒抹來貓嘴度，咁隻貓就會舔下舔下，唔會反感，來回十零次，衰貓就輕鬆貓左了。
今日（晚清）嘅貓，仲識食煙。陳寅東話：「有條友叫張小涓，喺浙中做縣尉。佢喺溫州住過一排，養幾隻貓，成日食煙。張小涓成日向住啲貓噴煙，啲貓又會哄個鼻埋去索。久而久之，佢啲貓就好似醉酒佬咁，每次見主人開燈食煙就黎，見主人收檔就走，於是啲人都話張小涓嘅貓都有煙癮，啲人聽親都笑。」
所以話，啲仆街貓係中意食煙飲酒架，你而家知咩事啦。
【附】
〈貓飲酒〉 金．李純甫
枯腸痛飲如犀首，奇骨當封似虎頭。嘗笑廟謀空食肉，何如天隱且糟丘。
書生倖免翻盆惱，老婢仍無觸鼎憂。只向北門長臥護，也應消得醉鄉侯。
