Member-only story
首先誠意推介，最近新follow 的Medium作者再思，寫文物修復。極有趣味，不可能只得25個followers。
尋日公司有人確診。今朝特登由港島出去觀塘排隊撩鼻，無他，朝早九點，鰂魚涌籌號派到千六。我十點觀塘攞籌，排二百六十，十點半已經撩完。然後搭船返港島。
外母快速測試亦都中左，壽嫂肯定頭痕。唔知好彩定唔好彩，佢早兩日返左娘家，屋企有人睇住，但我就要食自己了。
晏晝打左一陣機。其實人大左，鋪打機癮真係會慢慢無左。我夜晚仍然會同朋友打FIFA，但我視之為聯誼活動。唔係為左贏波，入幾多球，只係為左有個時間吹下水。否則真係寧願攤抖下。
朋友R最近同女友出去租屋住。我同已婚朋友C 問佢打機時有無感受到壓力。具體而言，就係打機時由女人喺背後發出嘅視線。即係即使個女人無出聲，亦可能碌緊電話，但你仍然感受到壓力。
黃子華話女人就係食咩咩咩咩瞓，好危險架。
後來我領悟到哩句說話嘅意思係：
女人幾時都好危險，唯二例外係食同瞓嘅時候。
傍晚睇左陣書。說來慚愧，重口味古人筆記唔知幾耐無更新。世事光怪陸離，比書中故事怪得多。Patreon 仲有4個讀者課金，我只能慚愧地多謝你地。講返讀書，分享以下一首詩：
旅次岳陽寄京中親故 曹鄴
君山南面浪連天，一客愁心兩處懸。
身逐片帆歸楚澤，魂隨流水向秦川。
月回浦北千尋雪，樹出湖東幾點煙。
更欲登樓向西望，北風催上洞庭船。
首詩講咩呢？題目「旅次岳陽寄京中親故」話你知，佢喺岳陽向南行，寄信畀京城嘅親人。
第一句「君山南面浪連天」講佢身處君山岸邊，風高浪急。第二句「一客愁心兩處懸」話你聽，佢係客路羈旅，人在岳陽，心在長安，所以話「愁心兩處懸」。「愁心」，哩趟旅程唔係自願。
第三、四句「身逐片帆歸楚澤，魂隨流水向秦川」很容易明白，人要上船向南行，心卻想隨流水回秦川長安呀。
第五、六句「月回浦北千尋雪，樹出湖東幾點煙」令人眼前一亮。好優美嘅詩中有畫，我腦海浮現出以下圖畫。「月回浦北」，佢一直係望向北方，望向長安。
最後「更欲登樓向西望，北風催上洞庭船。」講佢仲想望遠啲，但已經要上船起程了。
唔知大家睇完有咩感受。
我諗起離開香港嘅朋友，你地好嗎。
