Member-only story
壽按：國家不幸詩家幸。終於確診武肺，喉嚨痛到仆街，反而有時間寫下野。
1. 姚玉京與蘇小小，係中國頭兩個有名有姓有記載嘅娼妓。
2. 講左姚玉京先。
3. 姚玉京，娼家女也，嫁襄州小吏衛敬瑜，溺水而死，玉京守志養舅姑。
常有雙燕巢梁間，一日為鷙鳥所獲，其一孤飛悲鳴，徘徊至秋，翔集玉京之臂，如告別然。玉京以紅縷系足，曰：「新春複來，為吾侶也。」明年果至，因贈詩曰：「昔時無偶去，今年還獨歸。故人恩義重，不忍更雙飛。」
自爾秋歸春來，凡六七年。其年玉京病卒，明年燕來，周章哀鳴。家人語曰：「玉京死矣，墳在南郭」。燕遂至墳所，亦死。每風清月明，襄人見玉京與燕同游漢水之濱。至唐李公佐撰《燕女墳記》。
4. 壽譯：
姚玉京，娼家女黎。不過人地出身娼家，就未必係娼嘅。好似零零漆咁，無理由人地阿媽係漢奸，所以就話個女都係漢奸架嘛。Anyway，姚玉京嫁左襄州小吏衛敬瑜，但佢老公溺水而死。姚玉京好野呀，佢無再嫁，仲負責養埋老爺奶奶。
佢屋企成日有雙燕子，喺橫梁築巢。有一日，其中一隻燕子被鷙鳥捉走左。另一隻自己喺度飛，自己喺度悲鳴，直至秋天，佢停喺玉京手臂上面，好似同姚玉京講，我要走啦。
姚玉京用紅繩綁住佢隻腳，話：「下年春天你再黎啦，同我做個伴。」果然，燕子下一年真係返黎，姚玉京仲寫左首詩：
「昔時無偶去，今年還獨歸。故人恩義重，不忍更雙飛。」
自哩一年開始，秋去春來，已經六、七年。終於，姚玉京病死。再下一年，燕子返黎啦，佢見唔到姚玉京，圍住佢屋企哀鳴。家人同佢講：「玉京死左啦，葬喺城南外邊。」燕子飛到去佢墳前，亦都死左。
5. 以後，每逢風清月明夜，時運高嘅襄州人都會見到姚玉京同燕子喺漢水邊玩。後來，唐朝有個人叫李公佐，寫左篇《燕女墳記》記低哩件事。
6. 蘇小小。
7. 其實有關蘇小小嘅記載得一句。《樂府詩集．廣題》：「蘇小小，錢塘名娼也，南齊時人，有西陵歌。」
〈西陵歌〉總共二十字：
「妾乘油壁車 ，郎騎青驄馬。何處結同心，西陵松柏下。」
哩個係一個男女相遇嘅故事，女方坐住內倉有油壁嘅馬車，男方騎住青驄馬，佢地喺西陵松柏下，一見傾心。
8. 壽按：
後來，西湖有蘇小小墓。又有好多首詩，例如：「若解多情尋小小，綠楊深處是蘇家」「其奈錢塘蘇小小，憶君淚點石榴裙」。又有才子佳人故事《錢塘異夢》。
其實都只係後世文人墨客嘅想像同藝術加工。
不過，可以依然可以講，姚玉京同蘇小小，係中國頭兩個有名有姓嘅娼妓。
