你今日驗左未呀？

張圖刺唔刺激？絕對唔係講緊壽嫂驗孕，壽仔壽女仲未出場。

話說尋日外勤完，返到office門口已經嘈過街市。正諗緊係有人派散水餅定係有人祼跑嘅時候，同事同我講：

同事：隔離 team 有人中左獎呀！

我：六合彩？

同事：武肺呀！

我：咁我係咪唔應該返黎？

根據正苦邏輯，有事上報，收到上報嗰個再上報，等到有人決定再通知平民百姓都大半日。

大老細話大大老細話聽日全office 清潔，聽日唔洗返工（皇恩浩蕩）。聽朝十點前去交檢驗樽，後日朝早收到result ，後日下晝就要返工（老細們你知唔知咩叫潛伏期？）。

最後等到差唔多五點先有人黎派檢驗樽，先有得疏散。

今朝，我九半先起身（十點前交樽？係咩？碰），同事已經喺signal 講緊啲中心大排長龍，咩咩咩咩。我開始睇要點採樣。

採樣前兩個鐘，唔食得、唔飲得、唔刷得。即係起身即做啦。

(1) 於喉嚨發出「咔吐」的聲音。Make “Kruuna” sound from the throat。

仆你個臭街，一大朝早起身，口水都無幾滴，點樣喺喉嚨lur 啲唾液畀你呀？仲有呀「咔吐」同 “Kruuna” 都唔會清到喉嚨架。

lur 口水落去算，我好聽話，佢寫三至五次，我lur 左四次。

最後十一點先上去交樽。大家拭目以待。