Member-only story
【壽按】家事忙到PK，哩幾日先有少少自己時間睇書。
哩篇出自曹操集。短，但有意思。有興趣可以按「注」入面嘅連結，睇多少少典故。
【原文】
〈整齊風俗令〉
令：阿黨比周[1]，先聖所疾也。
聞冀州俗，父子異部[2]，更相毀譽。
昔直不疑無兄，世人謂之盜嫂[3]；
第五伯魚三娶孤女[4]，謂之撾婦翁[5]；
王鳳擅權[6]，谷永比之申伯[7]；
王商忠議[8]，張匡謂之左道[9]，
此皆以白為黑，欺天罔君者也。
吾欲整齊風俗，四者不除，吾以為羞。
【注】
[1]阿黨比周：即係結黨營私。
[2]異部：分開居住。
[3]直不疑：西漢御史大夫。正直、靚仔、無兄弟。但被人屈同阿嫂私通。哩件事產生左一個成語，叫做「無兄盜嫂」。即係盲人偷睇國家機密。
[4]第五伯魚：姓第五，名倫，字伯魚，東漢司空。有娶孤女嘅嗜好。
[5]撾婦翁：「撾」，意思係「打」。「婦翁」，老婆嘅老豆。第五伯魚娶親嘅女人都係孤兒，但被人屈佢打外父。
[6]王鳳：漢成帝時外戚，皇帝舅父。王家總攬朝政，唔係好人。王鳳姪兒王莽篡漢。
[7]谷永比之申伯：谷永，西漢大臣，刷王鳳鞋，話佢同申伯一樣。申伯，周宣王舅父，西周時申國第一個國君，《詩經．大雅．嵩高》成篇係讚揚申伯嘅德行。
[8]王商：西漢丞相，都係外戚，但不滿王鳳專權。壞人王鳳唔中意佢，所以係好人。
[9]張匡：張匡，企喺賤人王鳳嗰邊。同王鳳夾埋屈王商係壞人。
【錯譯】
〈整齊風俗令〉
是咁的，結黨營私，聖人君子就最睇唔起嘅。
我聽講河北社會風氣敗壞，父子分離，互相指責。
以前直不疑無大佬，世人老屈佢寢取阿嫂；
第五伯魚娶左三個孤女，又有人屈佢打外父；
王鳳專權，谷永比喻佢為德行高潔嘅申伯；
王商正直忠義，張匡屈佢係旁門左道嘅壞人。
喱啲都係以白為黑，欺天罔君嘅賤人。
今日我曹操要重整世間風氣，哩四類人如果無法清除，我絕對會覺得羞恥。
