Member-only story
古時嘅粉，一開始係用米粉，當然係男人用。
東漢有本書叫《釋名》（大約190–210年），係解釋唔同野嘅命名起源，可以按連結睇睇。
《釋名．釋首飾》：「粉，分也。硏米使分散也。赬粉者，赤也，染粉使赤，以著頰也。」
千幾年後（大約1292年），元朝有本書叫《古今韻會》都係咁講：「古傅面亦用米粉。又染之爲紅粉，後乃燒鉛爲粉。」
上面兩段引文講嘅野差唔多，主要話古時搽面嘅粉係米粉，後來有人將米粉染色，變為紅粉，再之後又有人燒鉛爲粉，再搽上面度。
搽鉛粉上面，古人早死唔係無原因嘅。而哩啲係漢朝，甚至更早嘅事了。
三國時有兩個粉樣故事
一、
《世說新語．容止第十四》：「何平叔美姿儀，面至白。魏明帝疑其傅粉，正夏月，與熱湯餅。既啖，大汗出，以朱衣自拭，色轉皎然。」
錯譯
何晏字平叔，靚仔黎，塊面非常白淨。魏明帝曹叡明顯小氣妒忌人靚仔，懷疑何晏搽粉。夏天某日三四十度，曹叡條仆街仔話賞賜熱湯餅畀何晏食。
癡撚線，何晏硬食一碗熱湯，飲完標汗標到食譚仔大辣咁，係咁用紅色衫袖抹汗。抹完，塊面仲白，佢果然係無搽粉。
二、
《魏略》：「（曹）植初得（邯鄲）淳甚喜，延入坐，不先與談。時天暑熱，植因呼常從取水自澡訖，傅粉。」
錯譯
從前有個叫邯鄲淳嘅名士投靠曹植，曹植相當開心，請邯鄲淳去屋企，但係唔同佢傾計住。點解？嗰陣天氣熱，叫人幫佢打水沖涼，仲搽粉先接見邯鄲淳。
好明顯，曹植搽下粉先見人係對世界嘅尊重，亦可見三國時搽粉應該相當普遍。
仲有一段，乘機經典重溫，揀條好 J 的故事。
《舊唐書．張易之傳》：「（易之、昌宗）兄弟俱侍宮中，皆傅粉施朱，衣錦繡服，俱承闢陽之寵。」
張易之、張昌宗兄弟都係武則天宮中嘅男寵，佢兩個搽粉搽胭脂，著靚衫，隨時隨地ON CALL 做武則天嘅鴨。
學下哩四個字「闢陽之寵」，即係皇后嘅男寵，即係SP啦。
